O Concello de Lugo, a través da súa Concellalía de Cultura, Turismo, Xuventude e Promoción da Língua ofrece un ano máis este popular programa de andainas, que para 2019 consta de 40 rutas. As de temática Patrimonio e Antropoloxía farémolas guías oficiais de turismo.
O pasado domingo 31 de marzo comezamos cun percorrido lembrando os Fidalgos e Labregos no Camiño Primitivo. Botamos a andar desde o alto da Vacariza (marco kilométrico do Camiño 126,736) e baixamos a través dos montes veciñais polo desvío de Vilabade.
Despois doutra voltiña para admirarmos a Fortaleza, xantamos en Castroverde (marco kilométrico 120, 719) onde se estaba a celebrar a feira. A dixestión fixémola polo camiño adiante, con pequenas paradas como a de Souto de Torres.
Entretivémonos no albergue novo da Pociña de Muñiz e no desvío polo núcleo en ruínas de Soutomerille, pero chegamos ao límite entre as parroquias de Gondar e Bascuas no Concello de Lugo (marco kilométrico 111,680). Tivemos moita sorte co tempo e a compaña! Grazas a todos e todas!